Gisela Küter´s Plattdeutsche Ecke

Afsiets

Afsiets, - Wat is dat?

Nüülich mal, as ik in Lübeck bi mienen Vetter to Besöök weer,
dor sä de doch wohrhaftig to mi:
”Na, ji wahnt doch woll ganz schöön afsiets!"
Afsiets? Mi bleev dat Muulwark vör Verwunnerung meist apen stahn.
Wat meen he dormit? Wat heet ”afsiets"? Dor harr ik noch gor nich över nadacht! Man ik meen, gewiss lohnt sik dat, wenn een sik mal mit dit Thema befaten deit.
För mi is dor, wo ik wahn, un wo ik dat schöön find, de Navel vun de Welt, un allens annere is afsiets. Aver wenn nu mien Vetter meent, blot weil wi nich in Lübeck wahnt leevt wi achter den' Maand, denn mennt villicht en Hamborger, en Lübecker wahnt afsiets, weil he nich in Hamborg wahnt.Un de wahnt denn ok noch mehr afsiets as wi hier in't Dörp, denn vun Lübeck na Hamborg sünd dat 60 Kilometer un vun Klinkraad na Hamborg blot 50.
Un uns' schöne Wischen, un dat Moor, un de Wehrensdiek? Wat wahnt de Lüüd in de Stadt doch afsiets dorvun! Dorför wahnt wi wedder afsiets vun de Ostsee un vun't Theater un warrt ok nich so männichmal in Hamborg in de U-Bahn överfollen, denn wi wahnt ja so wiet afsiets. Vele Dörpskinner wedderüm hebbt Peer un riet' dormit frie un unbehelligt vun Autos un Minschengewöhl in de Natur herüm. Dat fallt de Stadtkinner ja jüst swoor, denn se wahnt ja so wiet afsiets!
En Eremit, de afsiets vun de Minschen alleen op enen Barg wahnt, föhlt sik dor goot un bestimmt nich afsiets, un Axel Munthe höll woll ok den' Felsen vun San Michele för den Middelpunkt vun de Welt un dach gewiss nich in'n Drom doran, dat he för welk Lüüd afsiets wahnen dee.
Ergo bün ik to den' Schluss kamen, dat allens in de Welt relativ is. Un wo goot, dat mien Vetter nüülich dissen Satz to mi seggt hett, denn sünst harr ik gewiss nich doröver schreven!

Copyright © 2020 Gemeinde Klinkrade   |   Impressum   |   Datenschutz